PA Moria

MINGGU TANGGAL 23-29 JUNI 2013

T E M A             :GEREJA ERNANAM MAN SI ENTEREM

T U J U N         : Gelah Moria :

-          Jadi kesikel kalak si enterem ibas perukuren, perbahanen ras pengerana.

-          Maba perdamen i bas kegeluhen.

SI MAN OGEN: Jesaya 2:1-4

METODE PA   : Studi Kasus

Kata Penaruh.

Lit me sada penungkunen, engkai maka maun-maun adi pajek sada gereja ibas sada-sada ingan lit kalak si la ngasup ngalokenca? Ngkai maka la terudu kalak guna ngetehkai si lit ibas ras mengketisa? Ibas sada dampar minter lit jababna ibas Pustaka Si Badia. Umpamana Johanes 15:18, “ije nina Jesus, ula mamang atendu adi nembeh ate doni enda man bandu”. Arah dampar sideban, erdandanken Gereja lanai sikerajangen doni enda. Banci nembeh ate kalak Gereja erdandanken Gereja meritaken kerna kebenaren, turikenna kerna dosa manusia. Tentu man kalak si nggeluh i bas dosa la iakapna sikap adi ituriken kebenaren entah icidahken dosana.

Sendalanen ras sienda, Jesus pe ningetken i bas Matius 5:13, nina, bagi sira si seh perluna guna pangan, bage me kam guna doni enda. Si jadi penungkunen, engkai maka itulak kalak sira, adi kerina kalak perlu? Masin kinlah sira si cidahken kita man doni enda? Adi masin, engkai maka la teraloken kalak?  Penungkunen enda me si jadi perenungen man banta ibas kita er PA Minggu enda. Guna ndatken jababna mari ras-ras kita niksiki kata Dibata si jadi bahan PA-ta.

Mpebagesi Pengangkan Kerna Ogen.

Nabi Jesaya erdahin ibas pertengahen abad 8 sM i Israel Selatan (Juda). Kecibal kegeluhen bangsa Israel (subuk Israel Utara ras Israel Selatan) situalen ibas perbeliten (ekonomi). Si enda erkiteken litna hubungen si mehuli ras negara sideban. Israel Utara ndatken keuntungen ibas hubungen ras negara Fenesia ras Aram nari. Israel Selatan ndatken keuntungen ibas hubungen ras negara Arabia Selatan nari (Sebna ras Ofnir). Kecibal enda erbanca turah perekonomin negarasi mehuli. Tapi, la kerina rakyat ngenanamisa. Kalak si nggeluh arah perbinagan jadi kalak bayak. Kebayaken enda ipakena guna mpengaruhi pejabat negara ras si erdahin i bas Rumah Pertoton. Lanai idalankenna keadilen. Bage pe lagu langkahna si teptep wari pe lanai ergulamiten. Kegeluhenna desken sekalak diberu si pendahinna erlua-lua (Jesaya 1:21). Lanai setia man kai si ngena ate Dibata. Lit deba pe enggo nembah berhala.

Ibas kecibal si bagenda me, nabi Jesaya erdahin. Ibas sada dampar, mbue ia nuriken kerna kejahaten bangsa enda ras ukumen si nandangi inanamina (Jesaya 1:24-28). Ibas dampar sideban Jesaya nuriken nubuat kerna Juda ras Jerusalem. Jadi isina kal,nuriken uga kin situhuna arapen Dibata nandangi Juda ras Jerusalem. Alu kata si deban, kai si ikataken Jesaya i jenda eme situhuna ate Dibata si terjadi. Kai kin e?

Ayat 2, deleng-deleng ingan Rumah Pertoton e pajek, eme pagi deleng si meganjangna. Jelas, adi deleng enggo me pajek leben itepa Dibata. Jadi, si imaksudken Jesaya deleng eme gambaren Rumah Pertoton i Jerusalem. Si ipajekken i babo sada deleng eme Sion. Inti si ikataken Dibata i jenda labo soal bangunenna (gedungna), tapi guna litna Rumah Pertoton e pajek. Si enda teridah arah cara nggeluh bangsa Israel si ersembah ku je.  Kata ”Meganjang” banci si ertiken alu dua pengertin. Pemena eme teridah, ije me ‘pusat’ perhatin bangsa-bangsa. Peduaken eme menarik. Merincuh kalak natap dingen reh ku je. Enda bali ras si kataken Jesus i bas Matius 5:14, kuta si datas uruk la banci la teridah. Emaka bangsa-bangsa erdemuyung reh ku je.

Ayat 3, i jenda si idah maka rehen bangsa-bangsa ku Jerusalem (Rumah Pertoton Israel) arah ukurna jine. Keriahen ukurna reh ku je guna megi Kata Dibata. Merincuh ia ngeteh pengajaren si rehna ibas Tuhan nari. Enda banci saja erdandanken pengajaren si lit e la mereken kemalemen ate. Entah pe bangsa enda lanai ngasup ngalaken keadan si lit, emaka perlu ia pengajaren si mehuli.

Ayat 4, Perjengilen bangsa-bangsa idungi me. Ulih kalak si reh ku Rumah Pertoton eme litna perdamen. Gambaren perdamen icidahken alu menarik i jenda eme pedang jadi gigi tenggala, lembing jadi sabi-sabi. Enda ngataken litna perubahen ibas kegeluhen kalak si ersembah man Dibata. Si gelgel man kebiaren, tapi genduari enggo nampati si gelgel ngerugiken genduari maba keuntungen man kalak sideban.

Pengkenaina.

Adi si ukuri, kai nge sabapna maka pajekna Gereja la teraloken kalak? Ibas sada dampar, Gereja kurang erdiate kerna kebersihen ras sampah-sampah, dalan simpang nari ku Gereja pe la ipesikap erdandanken enterem kalak si ermotor (ermobil). Ibas pergaulen ras masyarakat pe kurang seh maka lit penggejapen ‘sombong’. Segedang dalan ku Gereja melala kalak musil, pemulung, la lit rumahna, tukang semir sepatu ras sidebanna la pernah isampati. Ibas rapat ras sidang Gereja la pernah icakapken kerna kai si banci ibahan man masyarakat sekelewetna, apai ka ngelakokenca.    

Arusna pajekna sada Gereja i bas sada ingan, jadi ”pusat perhatian” man kalak si deban, desken deleng Sion si meganjang ndai. Menarik akap kalak. Labo perban jilena gedungna, tapi perban jelmana si mehamat, mekacar, melumbar. Tupung ngerana Moriana malem ate kalak, seh maka merincuh kalak ku je. Ersada Gereja ras masyarakat sekelewetna. Tep-tep lit pesta Gereja  ikut sekelewet Gereja ngenanamisa ras ermeriah ukur. Si erbinaga ije pe lako binagana (kede kopi, kede nasi, kede kelontong). Adi lit man pekenan i Gereja, tukang sekitar Gereja si idilo mpekenasa ras sidebanna.

Ibas dampar si terbagesen, maka Gereja arusna pe mbue mbaba perubahen. Umpamana, ideher Gerejanta  lit ingan perdagangen ‘si la mehuli’ (perselingkuhen, prostitusi bage pe judi). Kenca pajek Gerejanta, mahan bana tutup ingan e. Enda tentu mbaba kesangapen man sekelewet Gerejanta. Entah i bas sada ingan nterem ije kalak gutul, ije pe lit siibahan Gereja emaka  reh urakna kalak gutul si megati mbaba keguluten man masyarakat ras keluarga, turah kedamen. Entah arah kiniersadan arih perpulungen banci ras-ras mpekena dalan, erban pengobaten gratis ras sidebanna. Adi bagendalah kerehen sada Gereja ku sada ingan tertentu, meriah ukur kalak ngalokenca, erkiteken lit nanamna man bana.

Studi Kasus.

Ibas sada ingan, lit ije gelarna Jln. Gereja. Ibas ingan e teremen kalak Kristen si lit ibas erbage-bage Gereja (denominasi). Janah ije ka me si mbuena ijumpai karang babi (la mejile ijaga kebersihenna, sabap minter teranggeh bau si la sikap adi kita ku je). I je me si rusurna bene baju bas pengkirahen. I je si mbuena kede kopi ras pakter tuak. Ibas kede ndai me si jumpai erek-erek togel, kalak erjudi ras kalak ersatur, lit asa ben, lit asa terang. La terjeng perbapanna  i kede kopi, pernandenna pe enterem mesegu erjudi i rumah tah arah pudi rumahna. Rusur pe cap kalak ingan e enterem kalak gutul ras preman. Emaka mbiar kalak mentas arah Jln. Gereja ndai. Tapi ibas wari minggu, enterem kalak enda ku gereja. Lanai siat bangku ingan kundul. Sora rende megang, koor ras vocal groupna erbolo-bolo.

1.    Kai si turah i bas ukurndu ngidah kecibal si bagenda? Turiken!

2.    Kai banci ibahan Moria gelah Gerejanta ernanam man kalak si lit isekelewetna? Lakokenlah!